14 रागनी जिला झज्जर गाम पहासौर जणा दिया हरियाणे मै:- मनजीत पहासौरिया
जिला झज्जर, गाम पहासौर, जणा दिया हरियाणे में,
विकास कुमार नै नाम कमाया, धर्म के ग्रन्थ सुणाणे में..!!टेक!!
चार मार्च सन उन्यासी, लग्न में बैठे बृहस्पति अान,
कैलाशवती जननी नै जन्मया, पुत्र एक बड़ा गुणवान,
दिव्य देह पै चिमके लागै, जणू बीच गगन खिलरया भान,
पिता दयानन्द खुशी में भरग्या, देख सुत की सुन्दर श्यान,
नाम करण संस्कार करा कै, लगे गऊ ब्राह्मण जिमाणे में..!!१!!
तीन भाइयों में अलग छटग्या , वेदों का विद्वान होया,
दिन – दिन कला निखरण लागी, फेर गाणे का ध्यान होया,
रणबीर सिंह सतगुरु बणाये, लय सुर का जित ज्ञान होया,
शुद्ध लिखणा और शुद्ध गाणा, मां शारदे का वरदान होया,
श्री जगन्नाथ नै थापी मारी, जो बसै गाम समचाणे में..!!२!!
मन मे विचार करने लाग्या, संस्कृति म्हारी हो स्वछंद,
गायन विधा का प्रसार होवै और नंगा नाच होज्या बन्द,
सेंसर बोर्ड जै पारित होज्या तो फूहड़ता का मिटज्या गन्द,
सभी कवियों को सम्मान मिलै जित, ऐसे भवन का हो प्रबन्ध,
वेदों की जहाँ शिक्षा मिलज्या, ना रहवै कसर पढ़ाणे में..!!३!!
मिलकै संघ बणाया म्हारी, संस्कृति म्हारा स्वाभिमान,
जन – जन को दी चेतना और बेटियों का राख्या ध्यान,
कपीन्द्र शर्मा गुरुजी कहते, कवियों की सदा ऊंची श्यान,
सत कर्म तैं ना मनजीत टलिये , चहे राह में कांटे दे बो जहान,
इस पहासौर आले नै माफ करियो, जै होज्या खता अणजाणे में..!!४!!
रचनाकार:- पं मनजीत पहासौरिया
फोन नं:- 9467354911
Email:- pt.manjeetpahasouriya@gmail.com
