कोरोना ल हराबोन

गीत -कोरोना ल हराबोन
~~~~~~~~~~~~~
कोरोना बैरी ल संगी,
मिलके हमन भगाबोन जी।
दीन दुखी के सेवा करके,
देश के मान बढ़ाबोन जी।
घर म अपन रहे के संगी,
नियम सुघर बनाबोन जी
जुरमिल के सब कोशिश कर,
कोरोना ल हराबोन जी।
//1//
हाथ धोबो साबुन म अउ,
बाँध मुहू ल ओनहा म।
परेरबो बासी ल खावत,
अपन घहर के कोनहा म।
दु गज भर के दुरिहा रहिके,
संगी ल गोठियाबोन जी।
जुरमिल के सब कोशिश कर,
कोरोना ल हराबोन जी।।
//2//
सर्दी खाँसी अउ बुखार ल
हलका म नई लेना हे,
डॉक्टर घर म जाके जल्दी,
बात जमों कह देना हे।
डॉक्टर साहेब जइसे कहही,
दवा गोली वो खाबोन जी।
जुरमिल के सब कोशिश कर,
कोरोना ल हराबोन जी।।
~~~~~~~~~~~~~~
रचनाकार-डिजेन्द्र कुर्रे “कोहिनूर”
पीपरभवना,बलौदाबाजार (छ.ग.)
मो. 8120587822