31.5k Members 51.9k Posts

रच दिया इतिहास

रच दिया इतिहास तन्नै, अमर होग्या यू नाम तेरा।
दिल तै करूँ सूं तन्नै, कर लिए कबूल सलाम मेरा।

दुनिया नै देख्या जी जान तै खेल्या तन्नै मैच फाइनल,
पहला राउंड जीता देश होया खुश, वा थी जीत असल,
नेट प खेलन के चक्कर म्ह दूसरा राउंड रहा असफल,
मन मन म्ह सब कहवैं जीतते ऐ प्रसाद बांटा राम तेरा।।

तीसरे राउंड में पिछड़ी तै साँस गयी थी अटक म्हारी,
जब करी तन्नै बराबरी तै, भर ख़ुशी म्ह किलकी मारी,
गेम पॉइंट बचाया तै, गेम पलटन की बंधी आस भारी,
हे हार होई तै के होया बेटी माना अहसान हाम तेरा।।

यू चाँदी का मैडल दिवाया तन्नै या के छोटी बात स,
न्यू सर ऊँचा होग्या म्हारा, सारा देश बेटी तेरे साथ स,
तन्नै बी साबत कर दिया हे छोरी ना छोरां तै घाट स,
हार जीत तकदीरां की बेटी बस खेलना स काम तेरा।।

गुरु रणबीर सिंह नै तेरी जीत की भारी ख़ुशी मनाई,
देख मैच तेरा बेटी सुलक्षणा नै ये चारों कली बनाई,
तेरी जीत प खूब झुमै नाचै हिंदुस्तान के लोग लुगाई,
बेटियाँ के दम प स रौशन दुनिया यू स पैगाम मेरा।।

©® डॉ सुलक्षणा अहलावत

16 Views
डॉ सुलक्षणा अहलावत
डॉ सुलक्षणा अहलावत
रोहतक
124 Posts · 67.3k Views
लिख सकूँ कुछ ऐसा जो दिल को छू जाये, मेरे हर शब्द से मोहब्बत की...
You may also like: